25 июль көнне сәгать 09.00да “Хаҗилар” мәчетеннән булачак хаҗиларны олы сәфәргә - хаҗга озату чарасы булып узды. Төркемнең җитәкчесе - Буа имам-мөхтәсибе Илмир хәзрәт Хәсәнов. Әлеге беренче төркем “Эконом” программасы белән Буадан 31 кеше хаҗга юл алды.
Буа хаҗиларын озату тантанасында Буа районының социаль мәсьәләләр буенча урынбасары Садретдинова Лилия Назыймовна, шулай ук булачак хаҗиларның туганнары, дуслары катнашты.
Мул табын артында узган елларда баручы хаҗилар тарафыннан теләкләр әйтелде, догалар кылынды. Хаҗиларны мәчет яныннан тәкбирләр әйтеп озаттылар. Алар автобус белән Казанга киттеләр, аннары очкыч белән Мәскәүгә юл тоттылар. 26 июль көнне хаҗилар ике төркем булып Дубай шәһәреннән Мәдинә шәһәренә юл тотачак. Хаҗиларга изге сәфәрдә уңышлар телисе генә кала.
