5-нче гыйнвар көнне “Хаҗилар” мәчетендә кышкы каникул вакытында мәктәп балалары өчен үткәрелгән дини чаралар тәмамланды. Буа районы имам-мөхтәсибе Илмир хәзрәт Хәсәнов шәкертләрне чын күнелдән гыйлем алулары белән котлады һәм дәвамлылык теләде.
Балалар атна буе мәчеткә килеп дин сабагы алды, мәчет янында урнашкан шугалакта футбол уйнады, төш вакыты җиткәч, мәчеткә кереп тәмле кайнар ашлар белән тукланды. Шәкертләрнең озтазлары - Мифтахетдинов Гомәр һәм Казанның “Рәшидә” үзәгендә укучы Сөләйманов Идрис сүзләренә караганда, балалар мәчеткә бик теләп йөргәннәр, остазлары өйрәткән дәресләрне ятлап килгәннәр. Шәкертләрнең ата-аналары Буа мөхтәсибәтенә, "Хаҗилар" мәчете имамы Фәһим хәзрәт Сөләймановка һәм кайнар ризык әзерләп торучы апаларга олы рәхмәтләрен җиткерәләр.
