23 февраль, ял көнне, Буа шәһәренең 8-нче мәчетендә зур өмә оештырылды. Икенче кат төзелеше тәмамлану сәбәпле һәм газ, су кертү эшләре төгәлләнгәч, мәчетнең эчен юып җыештырырга уйладылар. Өмәгә тирә-яктан хатын-кызлар, ир-атлар килде. Хатын-кызлар түшәм, стена, идән, тәрәзәләр юды. Суны ташып торуда, идән паласларын кагып кертергә аларга Кәбиров Рәмис Рәис улы һәм Рәшит Рөстәм улы булышты. Олы яшьтә булуларына карамастан, Әбдулманова Әлфия апа белән Габуддинова Наҗия апа да саваплы эштән читтә калмады. Мәчет тузаннан чистарып, ялт итеп калды. Өмәчеләрне кайнар пылау белән сыйладылар. Мәчет имамы буларак, Шамил хәзрәт Вәлиуллин өмәдә катнашучыларга Аллаһы Тәгалә саулык-сәламәтлекләрен арттырып, әҗер-савапларын бирсен диеп, дога кылды.
