Коронавирус пандемиясе һәм илдә, Татарстан Республикасында шул афәткә бәйле билгеләнгән чикләүләр тормышыбызга үз төзәтмәләрен кертте.
Бу вәзгыятькә бәйле рәвештә, изге Рамазан аенда Бөгелмә шәһәрендә һәм районында, традицион ифтар мәҗлесләре урынына, мохтаҗ кешеләргә өйләренә азык-төлек тупланмалары таратыла. Әлеге хәйрия акциясе кысаларында илле гаилә ифтар өчен азык-төлек алды инде. Болар: ураза тотучы, мохтаҗлык кичерүче, инвалид бала тәрбияләүче гаиләләр. Тупланмага чәй, он, ярмалар, шикәр комы, куертылган сөт, төрле консервлар, печенье, көнбагыш мае керә.
Аллаһы илчесе (салләллаһу галәйһи вә сәлләм) әйткән: “Рамазан аенда ураза тотучыны ашаткан кешенең гөнаһлары кичерелер, җаны җәһәннәм газабыннан коткарылыр, ул ураза тотучы алган савапка ирешер, әмма аңа карап, авыз ачкан кешенең ураза тоту савабы кимемәс”.
Бөгелмә шәһәре һәм Бөгелмә районы мөхтәсибәте изге Рамазан аенда күрсәткән ярдәме өчен муниципаль район башлыгы Линар Рөстәм улы Закировка рәхмәт белдерә.
