23 декабрьдә Бөгелмә шәһәре Үзәк мәчетендә ТР Диния Нәзарәтенең Бөгелмә шәһәре һәм районы мөхтәсибәте тарафыннан оештырылган "Без - татарлар" курсларында шөгыльләнүчеләр өчен ачык дәрес узды.
Дәрес Бөгелмә шәһәре һәм районы имам-мөхтәсибе Рамил хәзрәт Хөснетдиновның сәламләү сүзе белән башланып китте. Ул дәрестә катнашучыларга "Хозур" нәшрият йортында басылган "Ислам дине нигезләре" дигән китаплар бүләк итте. Әлеге хезмәт гакыйдә, фикһ, әхлак, ислам тарихы бүлекләреннән тора. Китап гади, аңлаешлы тел белән язылган, һәр тема тәфсилләп ачылган. Дәрес интерактив формада, проектор кулланып үткәрелде. Мөгаллимә башта татар телен өйрәнүчеләргә кыска метражлы видео күрсәтте, анда башлангыч сыйныф укучылары татар телендә шигырь сөйлиләр. Дәрес барышында тыңлаучылар фигыльләрне төрләндерү күнегүләре эшләделәр, сүзләрдә килеш кушымчаларын кабатладылар.
Шунысы сөенечле, менә өч ел инде Бөгелмә шәһәре һәм районы мөхтәсибәте татар телен өйрәнергә теләүчеләр өчен курслар оештыра. Быел түләүсез андый курслар шәһәрнең ике мәчетендә эшли: дүшәмбе һәм чәршәмбе көнне дәресләр - Үзәк мәчеттә, ә сишәмбе һәм җомга көнне "Ирхәм" мәчетендә уза.
Татар теле дәресләренә, ничә яшьтә һәм нинди милләттән булуына карамастан, теләгән һәр кеше йөри ала. Дәресләр 18 сәгатьтә башлана.
