Чистайда “Әнәс” һәм “Әниләр” мәчетләре каршында ике атналык җәйге рухи-сәламәтләндерү курслары тәмамланды. Соңгы көнне балалар өчен бәйрәм оештырылды, биредә алар курсларда үзләштергән осталыкларын күрсәттеләр, ата-аналар алдында сурәләр укып күрсәттеләр һәм мөнәҗәтләр башкардылар. Остазлар катнашучылар өчен җылы атмосфера булдырырга тырышты.
Балалар каршында нәсыйхәт сүзләре белән Мөхәммәд хәзрәт Кыямов, Аксакаллар шурасы рәисе Фәрит Галимов, мәчет имамнары Әбубәкер хәзрәт Газизов һәм Тимур хәзрәт Матвеев чыгыш ясады. Алар балаларга һәм аларның әти-әниләренә рухи тәрбия бирүнең һәм туган телне саклауның мөһимлеге хакында тагын бер тапкыр искә төшереп үттеләр.
