3нче апрель көнне Буа районы Түбән Наратбаш авылында мәчет ашханәсендә ифтар мәҗлесе булып узды. Мәҗлесне авыл имамы Рөстәм хәзрәт Баһауддинов башлап җибәрде. Буа шәһәре Госман мәчете имамы Илсур хәзрәт Нуруллин Рамазан ае башлану белән чын күңелдән үтемле нәсыйхәтләрен ирештерде. Зөфәр хәзрәт Коръән аятьләрен укыды, Илсур хәзрәт багышлап дога кылды. Азан әйтеп, халык ахшам намазы укып, авылда яшәүче Рәшит кардәш әзерләгән мул табынга рәхим иттеләр. Килгән хәзрәтләр үзләренең җылы сүзләрен ирештерделәр. Мәҗлес илгә-көнгә догалар кылып тәмамланды. Шундый мул табыннар әзерләгән өчен Раббыбыз рәхмәтләре яусын дип телибез.
