29нчы ноябрь көнне Буа районы “Хаҗилар” мәчетендә Әниләр көне уңаеннан чара узды. Район имам-мөхтәсибе Илмир хәзрәт Хәсәнов авыл-шәһәрләрдән килгән әби-апаларны, остабикәләрне бәйрәм белән котлап вәгазь сөйләде. Мәчет имамы Фәһим хәзрәт сүрәләр укып, бәйрәм белән котлады. Мөслимәләр рәисе Нәзимә ханым Сөләйманова котлауларга кушылды, кунакларга сүз бирде. Авыл остабикәләре, аларның шәкертләре рәхмәтләр әйтеп, шигырьләр сөйләп, мөнәҗәтләр әйттеләр.
Нәзимә ханым районыбызда ислам дине үсешенә көч куючыларның: мөхтәсиб дәрәҗәсенә җитәрлек итеп тәрбияләп Илмир хәзрәтне үстерүче Рузалия ханымга, Шамил хәзрәтне күп авырлыклар аша үтеп, имам булырлык итеп тәрбияләүче Миңнеруза ханымга рәхмәт хатлары тапшырды. Гомер буе акъәбиләр булып яшәгез дип иңнәренә ак ефәк шәл япты.
