14нче сентябрь көнне Азнакай районы Урсай авылының яңа мәчетендә Хәтер көне мәҗлесендә Әлмәт һәм Азнакай районы Мөслимәләр җәмгыяте җитәкчеләре Рәйхана ханым Ханнанова һәм Гөлшат ханым Шәйхулова, Чалпы авылы мөслимәләре, Азнакайдан мөгаллимәләр кунак булдылар.
Урсайлыларның традициясенә әйләнгән бу Хәтер көне мәҗлесе: авылда догадан киселгән әрвахларга, репрессия корбаны булган муллаларга, хәзерге вакытта махсус хәрби операциядә катнашкан сугышчыларның исән-сау кайтуына дога кылына торган, ай саен уздырыла торган күркәм чара булып тора.
Килгән кунаклар Урсай авылында яшәгән һәм шунда күмелгән шәйх, имам, хәлифә укучысы, кутбуль актаб (камил дини белем иясе), нәкышбәндия тарикате шәйхе имамы Нугайбәк улы Шәмсетдин җирләнгән каберне зиярәт кылдылар. Яңа мәчет шушы имам нәселе дәвамчысы булган Мусина Рәсимә Әзһәр кызы акчасына төзелгән. Мәчет төзүне үз өстенә алган Урсай авылы абыстае Гөлнәзира ханым Шакирова бу эшне алты айда башкарып чыккан һәм югарыда атап киткән мәҗлес тә шушы изге җанлы ханым идеясе белән оештырылган.
Мәҗлестә вәгазьләр сөйләнде, Коръәннән сүрәләр укылды, җомга кичен, тәүге Рабигуль әүвәл – Пәйгамбәребез ﷺ туган Мәүлид аена аяк басу белән котлаулар җиткерелде, догалар кылынды.
