Җыелыш Коръән аятьләрен уку белән башланып китте. Имам-мөхтәсиб Илмир хәзрәт Хәсәнов мөhим булган мәсьәләләргә тукталды. Аннан соң имамнар иртәдән кичкә кадәр дәресләр алды.
Беренче дәрес гакыйдә буенча үтте. Аны Кильдураз имамы Кадим хәзрәт Мөбарәкшин алып барды. Наратбаш имамы Рөстәм хәзрәт “Имам вазифалары” турында сөйләде. Өйлә намазы укыганнан соң Рәфил хәзрәт Исмаковның фикһ дәресен тыңладылар.
Икенде намазыннан соң имамнар “Хаҗилар” мәчете имамы Фәhим хәзрәт тарафыннан “Мәет юу” мәсьәләләренә басым ясадылар. Имамнар тәнәфес вакытында чәй, тәм-том белән сыйландылар. Имамнар бу дәресләрдән бик канәгать булып калды. Киләчәктә дә шундый дәресләр оештырырга кирәк дигән фикердә калдылар. Имамнарга Буа шәһәре мәчетләре төшкән календарьлар таратылды.
