27нче сентябрьдә Чечня Республикасында ТР Мәдәнияте көннәре кысаларында Татарстан киносы көннәре башлана. Әлеге чаралар вакытында Грозныйда “Ибн Фадлан” фильмы күрсәтеләчәк. Шулай ук Татарстанда төшерелгән “Мулла”, “Тарлан”, “Без – 41нче ел балалары” кинокартиналары тәкъдим ителәчәк.
Татарстан Республикасы киносы көннәре татар мәдәнияте һәм кинематографиясе белән якыннанрак танышырга мөмкинлек бирәчәк.
Тамашачылар “Ибн Фадлан” фильмын 28нче сентябрьдә “Киностар” кинотеатрында күрә алачак.
“Ибн Фадлан” фильмы Татарстан мөфтиятенең “Хозур” нәшрият йорты тарафыннан Идел буе Болгар дәүләтендә Ислам дине кабул ителүнең 1100 еллыгы уңаеннан төшерелде. Фильм РФ Мәдәният министрлыгыннан прокатка чыгу таныклыгы алды.
Документаль-нәфис кинолента Багдад илчелеге составында Идел буе Болгар дәүләтенә килгән гарәп дипломаты Әхмәд ибн Фадланның юлъязмаларына нигезләнеп әзерләнгән. Илчелекнең килүе Идел буе Болгарстанының 922нче елда ислам динен рәсми дин буларак кабул итүе белән бәйле.
Фото: фильмнан күренеш.
