Бүген, Зөлхиҗҗә аеның 9нчы көнендә, Татарстан хаҗилары хаҗның иң мөһим өлешен үтиләр – Гарәфә үзәнлегендә тору. Әгәр бу көнне гыйбадәт кылып, догалар укып һәм тәүбә сорап үткәрмәсәң, хаҗ үтәлгән булып саналмый.
Кояш чыкканнан соң хаҗилар автобусларда Мәккәдән тугыз километр ераклыктагы Мина үзәнлегеннән Гарәфәгә юнәлде. Хаҗны оештыручыларның сүзләренә караганда, барлык хаҗилар да үзләрен яхшы хис итә. Палаткаларда җилләткечләр (кондиционерлар) эшли, ашату оештырылган, эчәргә яраклы суны вакытында китерәләр.
Бүген кояш баеганнан соң, хаҗилар Мөздалифә үзәнлегенә барачак. Монда алар төн куналар һәм таң атканнан соң кабаттан корбан чалу һәм шайтанны символлаштыручы Җәмаратка таш ату йоласын үтәр өчен Мина үзәнлегенә юнәләчәкләр.
Татарстан хаҗиларын 20 табиб озатып йөри, аларга тәүлекнең теләсә кайсы вакытында мөрәҗәгать итәргә мөмкин. Медиклар кирәкле барлык медикаментлар белән җитәрлек күләмдә тәэмин ителгән.
Татарстаннан килгән барлык хаҗиларның кәефе күтәренке һәм алар үзләрен яхшы хис итә. Хаҗ кылучылар сынауларга рухи һәм физик яктан әзер. Аллаһы Тәгалә аларның хаҗын кабул кылсын!
