Түбән Каманың җәмигъ мәчете мәхәлләсе халкы Бөек Җиңү көне уңаеннан өлкән мөселманнарның хәлен белде. Әлеге күркәм чараны мәхәлләнең иң карт әгъзасе Кирам хәзрәт һәм җәмигъ мәчетенең яшьләр бүлеге оештырды.
Картларның күбесе сугыш ачысын татыган кешеләр һәм бүген алар гади аралашуга, игътибарга мохтаҗ. Мәхәллә халкы аларга махсус азык-төлек җыелмалары алып килде, ветераннарыбыз сугыш хәтирәләрен барлады һәм үгет-нәсыйхәтләрен җиткерде. Соңыннан яше-карты бергәләп Аллаһ Тәгаләгә бәрәкәтле тыныч тормыш өчен дога укыдылар.
