Теләчедәге ифтарда 150 кеше катнашты

24 июньдә Теләче бистәсенең “Маяк” кафесында район башлыгы Зарипов Илдус Фатыйх улы ярдәме белән 150 кешегә ифтар мәҗлесе үткәрелде. Берничә ел рәттән рамазан аеның һәр атнасында үткәрелә торган ифтар мәҗлесләре районыбызда бер күркәм йолага әверелеп бара. Ошбу дини чарада кунак буларак Болгар шәһәренең “Ак мәчет” имам хатыйбы Руслан хәзрәт Фархутдинов чакырулы иде. Ул җыелган халыкка рамазан аеның фазыйләтләре хакында вәгазь сөйләде. Чарада шулай ук районыбызда булган имамнар һәм җитәкчеләр катнашты, дип хәбәр итә Теләче мөхтәсибәте.