Бүген ТР МДН рәисе урынбасары Рөстәм хәзрәт Хәйруллин Яңа Чишмә районында имамнар, мәхәллә халкы белән очрашты. Хәзрәт иртәннән Акъяр авылы мәчетендә булды. Биредә тирә-як авыл имамнары, мәхәллә кешеләре белән очрашты. Хәзрәт аларга нәзарәткә кагылышлы яңалыклар, эшләр турында сөйләде. Күп сандагы сорауларга җавап бирде. Шушы җыелышта мәчеткә яңа имам сайланды. Тавыш бирү юлы белән, Илгиз хәзрәт Әшрәпов имамлык вазыйфасына билгеләнде. Рөстәм хәзрәт яңа имамны мөхтәсибәт белән тыгыз элемтәдә булырга һәм мәхәллә халкы белән актив эшләргә чакырды.
Акъяр авылында булгач хәзрәт район үзәгенә юл алды. Монда җирле хакимият вәкилләре, имам-мөхтәсиб, мәхәллә халкы белән очрашулар узды.
Рөстәм хәзрәт Хәйруллин сәфәре кысаларында Яңа Чишмә районындагы дини вәзгыять, рамазан уңаеннан оештырылган чаралар белән танышты, тәкъдимнәрне тыңлады.
