Быел Кайбыч районы мөхтәсибәтенең 10 мәхәлләсендә балалар өчен дини лагерьлар оештырылды. Анда 140тан артык укучы бала йөреп белем өстәде. Мәхәлләләрдәге дәресләрне район мөгаллимнәре һәм шулай ук Казан шәһәре мөселман уку йортларыннан җәйге практика үтәргә килгән ике шәкерт алып барды. Башка еллардан аермалы буларак, быел әлеге лагерларны оештырган мөгаллимнәргә хезмәт хакы да түләнде, ә иң яхшы оештыручыга - Олы Кошман авылы имам хатыйбы Фәрит хәзрәт Файзуллинга премия да бирелде.
2 августта ошбу мәхәлләләрдә укыган шәкертләрне районның “Салават күпере” спорт комплексына дини сабантуйга җыйдылар. Балаларның ихлас шатлыгы, күңелле уеннар, кызыклы бүләкләр, спорт ярышлары белән тулы бу рәхәт бәйрәмне Кайбыч районы мөхтәсибәте оештырды. Сабантуйда ат ярышы да, капчык киеп чабу да, тизлеккә йөгерү, чүлмәк ватыш уеннары да булды. Бәйрәмнең иң матур мизгеле - мәктәпкәчә яшьтәге балалар арасында Коръән уку ярышы иде. Бәйгедә Кайбыч районы башлыгы Альберт Рәхмәтуллин да катнашты. Сабантуйга килгән һәркем яктылык, җылылык һәм бәйрәм рухына күмелеп өйләренә таралышты.
