Теләче мөхтәсибәтендә балалар өчен лагерь эшләде

31 июльдә, җомга көнне, Иске Җөри бистәсе мәчетендә балалар өчен көндезге мөселман лагеры ишекләрен ачты. Төгәл бер атна дәверендә Иске Җөри, Теләче, Үзәк, Олы Мишә, Савыш авылларыннан килгән 50ләп бала коръән уку, тәһарәт белән намаз һәм иман төшенчәсенә кагылышлы дәресләр алды, вәгазьләр тыңлады. Өйлә намазыннан соң балалар төшке аш ашады, төрле уеннарда катнашты.
Дини сабакларны малайларга Иске Җөри авылы имамы Фәләхиев Мөхәммәт һәм Олы Мәтәскә авылы имамы Фәйзуллин Илнур, ә кызларга Мөхәммәдия мәдрәсәсендә укыган Фәйзуллина Илүсә бирде.
7 август көнне җомга намазыннан соң лагерьның тантаналы ябу чарасына районыбыз мөхтәсибе Исмәгыйль хәзрәт Фәләхиев килеп, балаларга истәлеккә бүләкләр тапшырды.