Бүген Татарстан мөфтие Камил хәзрәт Сәмигуллин үзенең резиденциясендә Иордания халыкара ислам университетының остазы – пәйгамбәребез Мөхәммәд (сәллаллаһу галәйһи вәссәлам)нең оныгы Хәсән (Аллаһ аннан разый булсын)аша Рәсүлебезнең нәсел җебен дәвам итүче шәех Мәхмүд Габдеррәззак Әс-Сәгъди белән очрашты. Мөфти кунакны нәзарәтнең мәгариф программалары белән таныштырды, аның белән РИИ һәм Иордания университеты арасында хезмәттәшлек итү юллары хакында сөйләште. Очрашуда сүз шәехнең Татарстан шәкертләренә махсус лекцияләр үткәрүе турында да барды. Сәфәре кысаларында Мәхмүд Габдеррәззак Әс-Сәгъди Болгардагы Ак мәчеттә мөхтәсибәт вәкилләре өчен дә лекция уздырачак.
