Азнакайда хаҗилар белән очраштылар

Хаҗ кылу ул күпләрнең хыялы, шуңадыр да бу изге сәфәргә барып кайткан туганнар, дуслар белән һәрберебез очрашырга, анда күргәннәрне сорашырга тели. Быелгы хаҗ аеруча дулкынландыргыч булды, күпләребез хаҗилар туган якларына исән-имин әйләнеп кайтсыннар дип, догалар кылды. Аллаһка шөкер, барлык татарстанлылар да әлеге изге сәфәрдән әйләнеп кайттылар һәм инде күргәннәре белән уртаклашырга ашыктылар.
Хаҗилар белән очрашулар Азнакай нуры мәчетендә һәм Зәнгәр мәчеттә булып узды. Бу елны Азнакай районыннан 8 кеше хаҗда булып кайтты, алар күргәннәрен бәйнә-бәйнә, озаклап сөйләделәр. Авырлыкларын да, җиңеллекләрен дә күргәннәр, ләкин шулай да хаҗнын һәрбер гамәлен җиренә җиткереп үтәп кайтканнар. Хаҗлары кабуллардан булсын!