2015 ел Татарстан мөселманнары Диния нәзарәте тарафыннан “Татар дин галимнәре елы” буларак игълан ителгән иде. Шул уңайдан Кукмара мөхтәсибәтендә төрле чаралар уздырылды. Шуларның берсе Кукмара мәдрәсәсендә булды. Декабрь ае дәвамында мәдрәсәдә һөнәри белем алучылар һәм мәдрәсә каршында эшләп килүче якшәмбе мәктәбе укучылары катнашында викториналар үткәрелде. Шәкертләр татар дин галимнәре тормышына, аларның мирасына багышланган сорауларга җавап бирделәр, шулай ук алдан әзерләнгән вәгазь-презентацияләре белән дә чыгыш ясадылар. Һәр викторина ахырында мөгаллимнәр нәтиҗә ясап призлы урын алучыларга бүләкләр тапшырды. Чараларның мул ризыклы табын алдында тәмамлануы да шәкертләрнең күңеленә хуш килде.
