25 декабрьдә Алабуганың җәмигъ мәчетендә Пәйгамбәребез Мөхәммәд (с.г.в.) тормыш юлына багышланган “Пәйгамбәрләр мөһере” дип исемләнгән интеллектуаль бәйге булды. Чарада Алабуга, Түбән Кама, Яр Чаллы, Мамадыш мөхтәсибәтләре командалары көч сынашты. Катнашучыларга бик тә кызыклы һәм мавыктыргыч сораулар әзерләнгән иде. Нәтиҗәдә, тирән гыйлемнәрен күрсәтеп Түбән Кама командасы җиңү яулады. Алабуга шәһәре һәм районы имам-мөхтәсибе Хәлим хәзрәт Шамсутдинов барлык катнашучыларга зур рәхмәтен җиткерде һәм җиңүчеләргә истәлекле бүләкләр тапшырды.
Рабиг әл-әүвәл ае дәвамында Пәйгамбәребезгә багышланган күркәм чаралар республиканың башка районнарыда да үткәрелә. Аерым алганда, үткән атнада Әтнә, Чирмешән, Кайбыч мөхтәсибәтләре, Казанның Кабан арты мәчете Мәүлид уңаеннан мәхәллә халкын җыеп кичәләр оештырды.
