26 мартта Татарстан мөфтие Камил хәзрәт Сәмигуллинның Балык Бистәсенә сәфәре район башлыгы Вәлиев Илһам Госман улы белән күрешеп, райондагы дини вәзгыять хакында сөйләшүдән башланды. Әлеге очрашуда мөфти урынбасары Рөстәм хәзрәт Хәйруллин һәм 16 ел җирлектә имам-мөхтәсиб булган Сәүдәхан хәзрәт Гайнетдинов та катнашты.
Район башлыгы мөфтигә динебез өчен хезмәте, авыл имамнарына игътибарлы булуы һәм хөрмәт итеп килүе өчен рәхмәтен белдерде. Шулай ук ул 80 яшен тутырган Сәүдәхан хәзрәт Гайнетдиновның дини-иҗтимагый эшчәнлеген зурлады. Бүгенге көндә районда 44 мәчет-мәхәллә эшләүдә, дини укулар оештыруда Сәүдәхан хәзрәтнең тырышлыгы, хезмәте зур булу хакында әйтте.
Камил хәзрәт, үз чиратында, җирле хакимиятнең дин әһелләренә карата алга таба да хәерхаклы булуын теләде, халыкка динебезне җиткерүдә үзара аңлашып эшләү, хезмәттәшлек итү мөһимлеген ассызыклады.
