Бүген Балык бистәсе районы Күгәрчен авылының иң борынгы мәчетенә ай куелды. Әлеге тантанада Балык Бистәсе районы мәгариф идарәсе җитәкчесе Илсур Садыйков, тарихчы Нурулла Гариф, район имам-мөхтәсибе Рамазан хәзрәт Хисаметдинов, мәчет бинасын төзекләндерергә алынган иганәче Мәрьямбикә Шәмсевәлиева, имамнар, чакырылган кунаклар катнашты. Тарихи бинаны киләчәктә мәдрәсә итеп файдаланырга ниятлиләр. Бүгенге көндә Күгәрчен авылында халыкка ике мәчет хезмәт күрсәтә, аларда Низаметдин хәзрәт белән Илдус хәзрәт имамлык итә.
Бүген ай куелган борынгы мәчет бинасы, өченче мәхәллә мәчете булып, 1906 елда ачылган. Борынгы тарихи-мирас һәйкәле булып саналган мәчетне төзекләндерү буенча быел 28 август көнне җыелыш булды. Ике ай вакыт эчендә аның түбәсе ябылды һәм бүген манара куелды. Совет чорында ул, икенче кат өстәлеп салынып, авыл советы бинасы булып хезмәт иткән була.
