Бүген Арча шәhәре "Җәмигъ" мәчетендә имамнар җыелышы булып узды. Бу күптән түгел имам-мөхтәсиб булып билгеләнгән Әмир хәзрәт Миңнемуллинның үз вазифаларында беренче имамнар җыелышы була. Очрашуда күбрәк оештыру мәсьәләләре һәм мөхтәсибәтнең алдагы эшчәнлек планнары турында сүз барды, аерым алганда Коръән уку бәйгесен уздыру турында, шулай ук имам-мөхтәсибнең ярдәмчеләре билгеләнде.
Әмир хәзрәт 27 февраль көнне Татарстан мөфтие Камил хәзрәт Сәмигуллинның Арча районы мөхтәсибәте уставы таләпләре нигезендә тәкъдиме белән бертавыштан имамнар тарафыннан сайлады. Миңнемуллин Әмир Зөфәр улы чыгышы белән Ярославль төбәгеннән, кечкенәдән үк Арчада яши. Биредә ул мәктәптә, мәчеттә белем ала. Аннары Төркиядә тәхфиз – Коръән ятлау курсларында укый. Казанда "Ислам динен кабул итүгә 1000еллык" мәдрәсәсе һәм Уфа мәдрәсәсен тәмамлый. Бүгенге көндә РИИда укуын дәвам итә. Өйләнгән. Моңарчы ул Әлмәт имам-мөхтәсибәтенең урынбасары булып эшләде.
Арча мөхтәсибәте мәчетләр саны буенча республикада беренче урында тора – аларның саны 80нән артык.
