Кичә, Рәҗәб аеның 23нче көнендә, Татарстан Республикасы мөфтие Камил хәзрәт Сәмигуллин йөкләмәсе белән Түбән Кама имам-мөхтәсибе Салих хәзрәт Ибраһимов РФ Президенты каршындагы дини берләшмәләр белән багланышлар советының Сүрия халкына ярдәм күрсәтү буенча Эшче төркеме составында Сүрия дәүләтенә сәфәр кылды.
Бу юлы Эшче төркем Сүрия халкына 12 тонна гуманитар ярдәм таратты. Сәфәр барышында Россия делегациясе вәкилләре, Сүрия дин әһелләре белән берлектә, Дәмәшк провинциясенең Барза районында төзекләндерелә торган мәктәпне карады. Кайчандыр анда меңләп бала укыган. Тик мәктәп террористлар тарафыннан кулга төшерелә. 2017 елда азат ителгәннән соң, аның бинасы тулай торак сыйфатында файдаланыла. Күптән түгел биредә төзекләндерү эшләре башланып киткән. Шунысын билгеләп үтәргә кирәк: Татарстан Республикасы мөселманнары Диния нәзарәте әлеге мәктәпне торгызу проектын башлап җибәрүгә үзеннән сизелерлек өлеш кертте.
Сәфәр кысаларында Россия һәм Сүрия дин эшлеклеләре гуманитар ярдәм күрсәтүнең актуаль мәсьәләләренә багышланган түгәрәк өстәл үткәрде.
