28 сентябрь көнне Чистай мөхтәсибәте проекты кысаларында «Ир-атлар лабораториясе» дип исемләнгән бик кызыклы һәм мавыктыргыч чара узды. «Иман» мәчете бинасында урнашкан ир-атлар лабораториясе инде 2 елдан артык эшли, аның бурычы-яшь малайларны ир-ат һөнәрләренә һәм күнекмәләренә өйрәтү. Әлеге проектның җитәкчесе – Зөлкарнәев Илфак, ул малайларны бар нәрсәгә дә өйрәтә. Проект тулы булмаган гаиләләрдә һәм балалар йортында тәрбияләнүчеләргә зур игътибар бирә.
Балалар өчен станцияләр аша узу нигезендә кызыклы чара оештырылды. Биредә «Пешекче», «Сантехник», «Столяр», «Электрик» станцияләре бар иде. Шулай ук ЮХИДИ ветераннары Советы вәкиле, «Куркынычсыз юл хәрәкәте» ДБУ профилактика бүлеге башлыгы урынбасары Олег Кирсанов һәм «Куркынычсыз юл хәрәкәте» ДБУ Чистай бүлеге җитәкчесе Светлана Сидорова катнашкан «ЮХИДИ» станциясе дә кертелде.
Балалар төрле сорауларга җавап бирделәр, тизлеккә бәрәңге чистарттылар, кагыйдәләр нигезендә велосипедта йөрделәр, юл йөрү билгеләрен җыйдылар, лампочка бордылар, ишек тоткасын төзәттеләр һәм су агызу җайланмасын алыштырдылар.
Нәтиҗәләр буенча балалар грамоталар белән бүләкләнде. Чара тәмамланганнан соң барысын да тәмле кичке аш көтә иде.
