Бүген, сәфәр аеның 19-нчы көнендә, КФУда «Державин укулары» XV Халыкара фәнни-гамәли конференциянең пленар утырышы узды. Форумда катнашучыларны һәм кунакларны ТР Дәүләт Советы рәисе Фәрит Мөхәммәтшин сәламләде. Татарстан мөселманнары исеменнән укуларда катнашучыларга ТР мөфтиенең мөхтәсибәтләр (территорияләр) белән эшләү буенча киңәшчесе Равил хәзрәт Зөфәров мөрәҗәгать итте.
Үзенең чыгышында ул: «Төрки тамырлы шагыйрь классицизм эстетикасында һәм мәгърифәт чоры рухында иҗат ителгән шигырьләрен «татар җырлары» дип атады, бу безгә шундый нәтиҗә ясарга мөмкинлек бирә: ул нәкъ менә төрки-славян үзаңына ия булды. Гавриил Державин үзенең нәсел-нәсәбе белән горурланган һәм беренчеләрдән булып Ислам темасы белән илһамланып, Евразия цивилизациясе асылы хакында уйланып, христиан һәм мөселман мәдәниятләрен тыгыз һәм табигый рәвештә үреп барган шәхесләрдән булган. Рус әдәбиятының “алтын чоры”на көнчыгыш мотивлары нәкъ менә Гавриил Державин исеме белән үтеп керә. Аның шигырьләре еш кына үз эченә дини мотивларны сеңдергән, аларда Раббыбыз телгә алынган», – дип билгеләп узды.
Державин укуларында федераль һәм региональ дәрәҗәләрдәге закон чыгару, башкарма һәм суд хакимияте органнары җитәкчеләре һәм хезмәткәрләре, җәмәгать эшлеклеләре һәм Россия Федерациясе Югары белем бирү оешмалары укытучылары катнаша. Конференциядә әдәби тарихи барышта Гавриил Державинның роле, шулай ук дөньяви темалар – хокукый, дини һәм медицина мәсьәләләре буенча фикер алышалар.
Фото: Максим Зарецкий
