Иртәгә, Шәүвәл аеның 20-нче көнендә (12-нче июньдә), сәгать 11:00-дә Казан ислам университетының Госман ибн Аффан исемендәге Коръән-хафизлар әзерләү үзәгенең Инстаграм аккаунтында @sentrkhafizovkazan турыдан-туры эфирда «Коръән-хафиз белән танышу» ачыктан-ачык онлайн әңгәмәләр циклы дәвам итә. Чираттагы очрашу кунагы – Коръәннең 10 кыйраәте буенча таныклыкка ия булган, Татарстандагы бердәнбер белгеч Раушан хәзрәт Йосыпов булачак.
Әңгәмәне Казан ислам университетының Госман ибн Аффан исемендәге Коръән-хафизлар әзерләү үзәге җитәкчесе Габдеррәшид хәзрәт Фәизов корачак. Очрашу барышында Раушан хәзрәт тыңлаучыларга Коръәнне ятлау тәҗрибәсе, Ливанда белем алуы турында сөйләр, шулай ук уңышлы һәм нәтиҗәле ятлауның серләрен ачар.
Турыдан-туры эфир барышында барлык теләүчеләр @sentrkhafizovkazan яки @yusupovraushan3 аккаунтыннан остазга Коръән-хафизлыкка ирешүгә кагылышлы сорауларны бирә ала. Сораулар татар һәм рус телләрендә кабул ителә.
“Коръән-хафиз белән танышу” туры эфирының чираттагы кунагы Татарстан мөселманнары Диния нәзарәтенең шәригать мәсьәләләре буенча бүлек җитәкчесе, Казан шәһәре казые вазыйфаларын башкаручы Булат хәзрәт Мөбарәков булачак.
