Бүген, Сафәр аеның 16 нчы көнендә (23 сентябрьдә), Татарстан мөфтие Камил хәзрәт Сәмигуллин Иваново өлкәсе мөселманнары Диния нәзарәте рәисе Фәрит Ляпин белән очрашты. Фәрит хәзрәт Казанга “Милләт Җыены”нда катнашу өчен килде. Бер уңайдан ул Татарстан Диния нәзарәте һәм Иваново өлкәсе мөселманнары Диния нәзарәте арасында төзелгән Килешү кысаларындагы эшчәнлекнең нәтиҗәлелеге хакында фикер алышу өчен мөфтияткә килде.
Очрашу вакытында Камил хәзрәт кунакны Татарстандагы дини вәзгыять, динара мөнәсәбәтләр, ТР мөселманнары Диния нәзарәтенең соңгы казанышлары белән таныштырды. Фәрит Ляпин, үз чиратында, Иваново өлкәсе мөселманнары Диния нәзарәте алып барган эшчәнлекнең өстенлекле юнәлешләре турында сөйләде.
