Кичә, сәфәр аеның 16 көнендә (23 сентябрьдә), Диния Нәзарәтендә мөселман яшьләре өчен яңа проект — «MuslimQuiz» акыллы уеннары эшли башлады. Беренче уен «Экстремизмга — юк!» айлыгы кысаларында «Тату яшик!» исеме астында узды һәм милләтара теләктәшлек һәм төрле дин вәкилләре арасында татулык темасын ачты.
Беренче акыл көрәшендә алтышар кешедән торган 15 команда, шулай ук җанатучылар, кунаклар жюри катнашты. Шунысы игътибарга лаек, уенда Казан яшьләре генә түгел, ә Мәскәүдән, Түбән Камадан, Яшел Үзәннән махсус «MuslimQuiz»га дип килделәр. Уенчылар табышмакаларга җавап эзләде, мантыйк мәсьәләләрен чиште, катлаулы интеллектуаль сораулар өстендә уйлады, ребуслар чиште, авазларның килеп чыгышын эзләде, танылган рекламаларның эпизодларын искә алды һ.б.
Уен «акыл һөҗүме» форматындагы 6 раундны күздә тота. Бер раундта 6 сорау. Барлыгы 2021-2022 ел сезонында «MuslimQuiz»ның 6 очрашуы узачак. Аларның нәтиҗәләре буенча, иң күп балл җыйган команда кыйммәтле бүләк алачак.
Бу юлысы барлык призлы урыннарны Казан яшьләре алды. Киләсе уен октябрьнең икенче яртысында узачак.
