Норлат һәм Чистай мөхтәсибәтләрендә социаль ашханәләр эшләвен дәвам итә. Биредә кайнар ризыкны һәр көнне, диненә һәм милләтенә карамастан, һәр мохтаҗ кеше килеп ала.
Әлеге изге башлангыч Норлат мөхтәсибәтендә 2021 елның февралендә эшли башлады. 9 ай барышында Әхмәтзәки Сафиуллин исемендәге тәгълим үзәгендә барлыгы 13500 мохтаҗ ашатылды. Иртәнге сәгать 11дән көндезге икегә кадәр ланч-боксларга салынган кайнар ризыкны мөхтәсибәт вәкилләре 60-70 кешегә өләшә. Мохтаҗлыкта яшәүчеләр, фәкыйрь-мескеннәр, күп балалы гаиләләр – атнасына якынча 426-490 кеше итле, кайнар ашлар белән тәэмин ителә. Ашамлыклар сәдакага җыелган акчага сатып алына, сәдаканы ризык белән китерүчеләр дә бар. Киләчәктә тәгълим үзәгендә көн саен 100-ләп кешене ашату күздә тотыла. Норлат мөхтәсибәте әлеге эшчәнлекне район хакимияте һәм социаль хезмәткәрләр белән бергә башкара.
Авыр тормыш хәлендәге барча ач кешегә ярдәм күрсәтүдән тыш, мөхтәсибәттә тагын мохтаҗларга җәйге, көзге, кышкы киемнәр таратыла. Яхшы хәлдәге яки яңа киемнәрне районның мохтаҗ халкы тәгълим үзәгенә килеп ала.
Татарстанда мохтаҗларны ашату буенча социаль башлангыч шулай ук Чистай шәһәренең “Нур” мәчетендә дә дәвам итә. Биредә көн саен 45-55 кеше кайнар ризык белән тәэмин ителә.
