Бу көннәрдә Татарстан мөфтиенең халыкара мәсьәләләр буенча киңәшчесе, Түбән Кама имам-мөхтәсибе Салих хәзрәт Ибраһимов – Җибути дәүләтендә (Африка). Бу ил башкаласына ул Татарстан мөселманнары башлыгы, мөфти Камил хәзрәт Сәмигуллин әмере белән РФ Президенты каршындагы дини берләшмәләр белән хезмәттәшлек Советының дин тотучыларны дискриминация һәм ксенофобиядән хокукларны яклау буенча милләтара төркем составында китте. Салих хәзрәт Ибраһимов РФ сенаторы, Африка илләре белән икътисадый хезмәттәшлек буенча координация комитеты рәисе И.Н.Морозов җитәкчелегендә конференцияләрдә һәм очрашуларда катнаша. Салих хәзрәт Ибраһимов үз чыгышында Россия мөселманнары исеменнән чыгыш ясады, мөфти Камил хәзрәт Сәмигуллинның сәламләү сүзләрен җиткерде, Нәзарәт эшчәнлеге һәм Татарстанда конфессияара хезмәттәшлек тәҗрибәсе турында сөйләде.
