Бисмилләһир-рахмәнир-рәхим.
Хөрмәтле дин кардәшләр! Газиз милләттәшләрем!
Әссәламү галәйкүм вә рәхмәтуллаһи вә бәрәкәтүһү!
Бүген, 8 июльдә, кояш баеганнан соң иң бөек мөселман бәйрәмнәренең берсе – Корбан гаете җитә. Сезне чын күңелдән якынлашып килүче шушы мөбарәк көн белән тәбрик итәм!
Корбан бәйрәме Зөлхиҗҗә аеның беренче ункөнлеген – Аллаһ Раббыбыз аеруча яраткан, дин кардәшләребез гыйбадәтләрен аеруча тырышлык белән кылырга тиешле көннәрне тәмамлый. Бу ункөнлекнең фазыйләтләрен һәм олылыгын Коръәни Кәрим дә, сөекле Пәйгамбәребезнең ﷺ сөннәте дә күрсәтә. Мисал өчен, “әл-Фәҗр” сүрәсе шундый аятьләр белән башлана:
وَالْفَجْرِ وَلَيَالٍ عَشْرٍ
Мәгънәсе: «Таң белән ант итәмен! Ул көн белән дә (ант итәмен)!» (89:1-2). Коръәнне тәфсир кылучы галимнәрнең биредә Зөлхиҗҗә аеның 10 көне турында сүз баруында шиге юк. Хәдисләрнең берсендә әйтелә:
عَنِ ابْنِ عَبَّاسٍ قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " مَا مِنْ أَيَّامٍ الْعَمَلُ الصَّالِحُ فِيهَا أَحَبُّ إِلَى اللَّهِ مِنْ هَذِهِ الْأَيَّامِ ". يَعْنِي أَيَّامَ الْعَشْرِ، قَالُوا : يَا رَسُولَ اللَّهِ، وَلَا الْجِهَادُ فِي سَبِيلِ اللَّهِ ؟ قَالَ : " وَلَا الْجِهَادُ فِي سَبِيلِ اللَّهِ، إِلَّا رَجُلٌ خَرَجَ بِنَفْسِهِ وَمَالِهِ فَلَمْ يَرْجِعْ مِنْ ذَلِكَ بِشَيْءٍ ".
سنن أبي داود 2438
Ягъни: «Ибне Габбас радыйаллаһүганһү Рәсүлебезнең ﷺ шундый сүзләрен җиткерә: “Хәерле гамәлләр өчен шушы 10 көннән дә яхшырак көннәр юк”. Кешеләр сораган: “Хәтта Аллаһ юлындагы җиһад тамы?” Ул җавап биргән: “Хәтта Аллаһ юлындагы җиһад та. Кеше үзен һәм якыннарын дошманнар һөҗүменнән, гомерен һәм байлыгын югалту куркынычы астында калган килеш, яклап берни казанмаган хәлдән тыш» (Сунан Абу Давыд, 2438). Шул рәвешле, Зөлхиҗҗәнең бу көннәре безне Аллаһының рәхмәтенә юл ача – әгәр шушы мөбарәк вакытта хәерле гамәлләр кылсаң, син Раббыбызның ризалыгына һәм әҗер-савапларына ирешерсең! Һичшиксез, бу көннәрдә хәерле гамәлләрнең иң мөһимнәре булып хаҗ кылу һәм корбан чалу тора.
Аллаһка шөкер, быел Татарстан Президенты Рөстәм Нургали улы Миңнехановның тырышлыклары белән, Россия мөселманнарны пандемия башланганнан бирле быел беренче тапкыр изге Мәккә һәм Мәдинә җирләренә олы сәфәр кыла ала. Татарстаннан 810 мөселман хәзерге вакытта - Гарәфә үзәнлегендә, алар Яралтучыбыздан елап мәгъфирәт һәм ризалык сорый. Гарәфә көне белән бергә бүген тәкбир-тәшрик көннәре дә килеп җитте, һәм алар 12 июльгә кадәр дәвам итәчәк. Бу көннәрдә, 8 июльнең иртәнге намазыннан башлап, 12 июльнең икенде намазын да кертеп, егерме өч фарыз намазның һәркайсыннан соң сәлам биргәч, Аллаһы Тәгаләне олылап, тәкбир-тәшрик әйтелә. Раббыбыз Аллаһ һәрбарчабызга изге җирләрдә хаҗ кылырга һәм Аның Йортына маңгай-битләребез һәм йөрәкләребез белән кагылып китәргә язсын иде! Хаҗ кылучы дин кардәшләребезнең гыйбадәтләре кабул булсын!
Корбан гаетен мөселманнарның барысы да хаҗда каршыламый. Әмма туган ягында калган мөселманнар да бәйрәм итә һәм Аллаһыга үзләренең тугрылыкларын шөкер кылып, сәдака биреп һәм корбан чалып исбат итәргә омтыла. Хәдистә әйтелә:
عَنْ زَيْدِ بْنِ أَرْقَمَ ، قَالَ : قَالَ أَصْحَابُ رَسُولِ اللَّهِ صَلَّى اللَّهُ عَلَيْهِ وَسَلَّمَ : يَا رَسُولَ اللَّهِ مَا هَذِهِ الْأَضَاحِيُّ ؟ قَالَ : " سُنَّةُ أَبِيكُمْ إِبْرَاهِيمَ ". قَالُوا : فَمَا لَنَا فِيهَا يَا رَسُولَ اللَّهِ ؟ قَالَ : " بِكُلِّ شَعَرَةٍ حَسَنَةٌ ".
Ягъни: “Зәйед ибне Әркама радыһаллаһүганһү хәбәр иткәнчә: «Сәхабәләр сораган: “И Аллаһның рәсүле ﷺ, корбан чалу – нәрсә ул?” Пәйгамбәребез әйткән: “Ул – сезнең атагыз Ибраһим галәйһисәламнең дине”. Алар сораган: “Бу гыйбадәтне кылып, без нәрсә казанабыз?”. Пәйгамбәребезﷺ әйткән: “Корбанлыкның һәр чәч бөртегеннән сезгә савап языла”. Ибраһим галәйһисәлам – тәүхид вәгазьчесе, бөек пәйгамбәр, хәлилуллаһ. Бөтен кешелек дөньясына аның тарафыннан күрсәтелгән Аллаһка тугрылык - тиңсез һәм башка бер тапкыр да адәм затлары тарихында кабатланмый!
Аллаһка карата аның тиңсез тугрылыгы бөтен кешелек дөньясына үрнәк булып тора һәм адәм затлары тарихында башка бер тапкыр да кабатланмый! Аның шушы какшамас тугрылыгы һәм көчле иманы Корбан гаетен бәйрәм итүгә сәбәп була да инде.
Татарстанда Корбан гаетен үзебезнең дин кардәшләр дә, башка дин вәкилләре дә зарыгып көтә. Чөнки дини һәм милли карашлары нинди булуга карамастан, барлык мохтаҗлар өчен дә ул – юмартлык, игелек һәм сыйлар тантанасы. Аларга корбан итләре тарату аша Корбан гаете безне Аллаһ ризалыгы өчен мал-мөлкәтләребезне фида кылырга өйрәтә, Аңа үзебезнең тугрылыкны һәм сансыз нигъмәтләре өчен ихлас рәхмәтебезне исбатларга мөмкинлек бирә.
Газиз милләттәшләрем! Шушы мөкатдәс гает көннәрендә Аллаһ Тəгалə безнең корбаннарны кабул итеп, Үзе риза булырлык гамəллəр кылырга һəм рəхмəтле булган җəннəтлəренə ирешүлəребезне насыйп кылса иде дә, гыйбадәтләребез өчен савапларын арттырып, ике дөньяда да Үзенең чиксез мәрхәмәтен насыйп әйләсә иде. Өйләребездә бәрәкәт, иминлек булып, иман нуры балкып торсын! Бәйрәм белән!
Татарстан мөфтие Камил хәзрәт Сәмигуллин.
