Бүген, зөлҗиҗҗә аеның 12нче көнендә (11нче июльдә), Татарстаннан килгән хаҗилар, Мина үзәнлегендә торганда, Җәмәратка – шайтанны гәүдәләндергән өч баганага өченче тапкыр барып, таш атты. Шулай итеп, мөселманнар хаҗның барлык йолаларын үтәүне тәмамлады һәм Мәккәгә үзләре яшәгән кунакханәләргә исән-сау әйләнеп кайтты.
Мәккәгә кайткач, татарстанлыларга Кәгъбә тирәли саубуллашу тәвафын үтәргә кирәк. Моннан тыш, теләге булганнар өстәмә рәвештә гомрә кылырга, Мәккәнең истәлекле урыннарын зиярат итәргә мөмкин. Алар шулай ук тәваф кылыр һәм фарыз намазларын укыр өчен әл-Хәрам мәчетенә бара, кунакханәләрдә имамнарның вәгазьләрен һәм дәресләрен тыңлый.
Хаҗ йолаларын үтәгәндә, тәүлек әйләнәсендә «ДУМ РТ Хаҗ»ның медпункты эшләде. Табибларга көненә 200ләп кеше мөрәҗәгать итте. Табиблар кирәкле дарулар һәм җиһазлар белән тәэмин ителгән иде.
