Раҗәб аеның 11 нче көнендә (2 февральдә), Балтач балалар сәнгать мәктәбе Балтач районы мөхтәсибәте белән берлектә "Ислам моңы" мөнәҗәтләр бәйгесенең гала-концертын уздырды. Бәйгедә районның төрле мәктәп, балалар бакчаларыннан килгән балалар, яшүсмерләр, авыл җирлекләре һәм бистәнең өлкән яшьтәге мөнәҗәт әйтүчеләр катнашты.
Мөнәҗәтләр бәйгесе Татарстанның халык артисткасы, Муса Җәлил премиясе лауреаты, җырчы Гөлзадә Сафиуллина уздырган мастер-класс белән башланып китте. Мөнәҗәтләр әйтү бәйгесенә нигез салган хөрмәтле артистка тамашачыларны мөнәҗәт-бәетләр тарихы белән таныштырды, мөнәҗәтләр әйтеп узды.
Илаһи моң тулы күңелләреннән саркып чыккан мөнәҗәтләрне тыңлаучылар йөрәгенә илтеп җиткерә алган бәйге җиңүчеләренә төрле дәрәҗә дипломнар да тапшырылды. "Ислам моңы" мөнәҗәтләр бәйгесе җиңүчеләрне бүләкләү мизгелләре күңелләрне айкап кереп, йөрәкләргә шифа салучы мөнәҗәтләр әйтү белән үрелеп барды.
Фотосурәтләр ВКонтакте социаль челтәрендәге “Балтаси.ру - городской портал!” төркеменнән алынды.
