Бүген Мәскәүдә Россия Тышкы эшләр министрлыгының кабул итүләр йортында «Россия – ислам дөньясы» стратегик күзаллау төркеме җитәкчелеге Ислам хезмәттәшлеге оешмасы әгъзалары булган дәүләтләр илчеләре белән очрашты.
Очрашуда Россия Хөкүмәте Рәисе урынбасары Марат Хөснуллин, Россия Тышкы эшләр министры Сергей Лавров, «Россия – ислам дөньясы» стратегик күзаллау төркеме җитәкчесе, Татарстан Рәисе Рөстәм Миңнеханов, Татарстан мөфтие Камил хәзрәт Сәмигуллин катнашты. Чара 2022 ел йомгаклары һәм 2023 елда «Россия – ислам дөньясы» стратегик күзаллау төркеме эшчәнлеге перспективалары буенча узды.
Марат Хөснуллин һәм Сергей Лавров ассызыклаганча, мөселман илләре белән хезмәттәшлек – Россиянең тышкы сәясәтендә иң мөһим өстенлекләреннән берсе. Рөстәм Миңнеханов үз чиратында барлык чит ил һәм Россия коллегаларына «Россия – ислам дөньясы» стратегик күзаллау төркеме эше юнәлеше буенча үзара файдалы хезмәттәшлекне үстерүгә керткән өлешләре өчен рәхмәт белдерде. Шулай ук ул 18-19 майда булачак «Россия – Ислам дөньясы: Kazan-Forum» халыкара икътисади форумына аерым тукталды.
Татарстан Рәисе матбугат хезмәте фотосурәтләре һәм мәгълүматы файдаланылды.
