Казанда Рамазан ае алдыннан «Чиста мәчет» акциясе башланды. Гадәттәгечә, изге Рамазан ае алдыннан битараф булмаган мөселманнар Казан мәчетләрен җыештыра. Узган ялларда 30 волонтер Казанның Идел буе районындагы «Әниләр» мәчетенә өмәгә җыелды. Алар беренче ике каттагы тәһарәт алу бүлмәләрен, намаз залларын һәм аскы катта ял көннәрендә дәресләр уза торган кабинетны җыештырды. Хатын-кызлар тузан сөртте, келәмнәрне чистартты, идәннәрне һәм җиһазларны сөртеп чыкты, пәрдәләрне юып элде, ә ир-атлар мәчеткә керү юлларын чистартты, җиһазлар күчерде.
Мөфтият волонтерлары, быел акция башланганнан бирле, «Миргазиян», «Тәүфикъ», «Мәдинә» һәм Апанай мәчетләрен тәртипкә китерергә өлгерде. Чираттагы өмә 12 мартта "Рөстәм" мәчетендә көтелә.
Игелекле эштә (843)237-86-18 телефонына шалтыратып яки телеграмм-каналда «Чиста мәчет» акциясе чатында язылып катнашырга мөмкин.
