Бүген, Шәгъбан аеның 24нче көнендә (16нчы мартта), Татарстан мөфтие Камил хәзрәт Сәмигуллин Нәзарәттә “Ханский дом” төзелеш компаниясе җитәкчесе Ильяс Гыймадов белән очрашты. Очрашуда шулай ук “ТР Вакф” фонды генераль директоры Фирдүс Галиуллин катнашты. Мөхтәрәм кунак Питрәч районы Үзәк мәчете төзелеше барышы һәм хәзерге вакытта башкарылган эшләр белән таныштырды. Бүгенге көндә бина күтәрелде, түбәсе бар, подвалда, беренче-икенче катларда эчке эшләр алып барыла, зур гөмбәз һәм ай кую көтелә. Гыйбадәт йортын Рамазан-шәриф аена техник ачу планы куелды.
Аннары Питрәч районы Беренче Май поселогында төзелүче мәчет турында сүз алып барылды. Төзелеш компаниясе җитәкчесе Ильяс Гыймадов шулай ук республикада мөселман инфраструктурасын үстерү, шәригать буенча договорлар төзү үзәген булдыру мәсьәләләре хакында да үз тәкъдимнәрен җиткерде.
Мөфти Ильяс Гыймадовка республикада мөселман төзелешләрен алып баруга керткән тырышлыклары өчен рәхмәтен белдерде, үзенең киңәш-фикерләрен җиткерде.
