Татарстан мөфтие Камил хәзрәт Сәмигуллин Диния Нәзарәте коллективы, республика имамнары һәм мөселманнары исеменнән, ягулык станциясендә шартлау сәбәпле, кардәш Дагыстан халкының тирән кайгысын уртаклаша.
"Якыннарын һәм туганнарын югалтканнарның ачы кайгысын уртаклашам. Татарстан мөселманнары аларга бу фаҗигане кичерергә рухи көч һәм ныклык тели. Догаларыбыз моның иң яхшы чагылышы булыр: Раббыбыз һәлак булганнарның гөнаһларын ярлыкасын, рәхим-шәфкатеннән ташламасын, шулай ук аларның якыннарына бу авыр сынауны кичерерлек сабырлык бирсен! Шушы афәттә зыян күрүчеләргә дә Аллаһ шифасын бирсен, тизрәк савыксын дип телим", - дип язды хәзрәт үзенең рәсми телеграм-каналында.
