Бүген Мәскәүдә Халык хуҗалыгы казанышлары күргәзмәсе (ВДНХ) мәйданчыгында “Россия” Халыкара күргәзмә-форумы кысаларында Татарстан Республикасы көне узды. Аның эшендә күп кенә югары дәрәҗәле затлар катнашты: Татарстан Рәисе Рөстәм Миңнеханов, Россия вице-премьеры Марат Хөснуллин, РФ спорт министры Олег Матыцин, РФ төзелеш һәм торак-коммуналь хуҗалык министры Ирек Фәйзуллин һ.б. Шәрәфле кунаклар арасында Татарстан мөфтие Камил хәзрәт Сәмигуллин һәм аның беренче урынбасары Илфар хәзрәт Хәсәнов та бар иде.
Күргәзмәдә республиканың мәдәни программасы татар халкының традицияләре, тарихы һәм мәдәнияте, шулай ук икътисадның төрле тармакларында Татарстанның заманча перспективалы өстенлекләре һәм казанышларыннан гыйбарәт булды.
Экспозицияләр республиканың сәнәгатьтә, авыл хуҗалыгында, икътисадта, медицинада, мәдәнияттә һәм туризмда зур казанышлары турында сөйли.
Шулай ук Мәскәүдә “Россия” Халыкара күргәзмә-форумында Төбәк көнендә һәр кунак үзен Казансу яры буйлап велосипедта йөрүче турист итеп хис итә ала. “Россия” күргәзмә-форумы 4нче ноябрьдә Халык хуҗалыгы казанышлары күргәзмәсе (ВДНХ) мәйданчыгында ачылды һәм 12нче апрельгә кадәр дәвам итәчәк. Биредә Россиянең 89 төбәге, зур компанияләр, министрлыклар һәм оешмаларның казанышлары күрсәтелә. Күргәзмәгә РФ Президенты Владимир Путин килер дип көтелә.
