Диния Нәзарәте Татарстан имам-мөхтәсибләре һәм казыйлары өчен белем күтәрү курсларын башлап җибәрде. Ике көнлек дәресләр алу өчен республиканың барлык районнарыннан мөхтәсибләр һәм аларның ярдәмчеләре, төбәк казыйлары җыелды. Дәресләрне дин әһелләренә олуг галим – шәех, шәригать фәннәре докторы, профессор Хусамеддин Мөхәммәд Салих Фарфур әл-Кадирий әл-Хәсәни бирә. Лекция Коръән гыйлеме фәнендәге мөһим мәсьәләләрне өйрәнүгә багышлана.
Бүген өйлә намазыннан соң Сүриядән килгән шәех Коръән укуның фазыйләтләрен, аның дәрәҗәсен, мәртәбәсен ачыклады, сәхабәләрнең ничек Коръән укуына тукталды, Пәйгамбәрдән ﷺ Коръәнне тиз арада ничек ятлап алганнар, Коръәнне ничек матур итеп укырга тырышканнар һ.б. мөһим мәсьәләләр турында сөйләде, имам-мөхтәсибләрнең сорауларына җавап бирде.
Татарстан Республикасы имам-мөхтәсибләре һәм казыйлары өчен оештырылган квалификация күтәрү курслары Нәзарәтнең Пленум утырышы белән төгәлләнәчәк.
