Мөхәррам аеның 12нче көнендә (18нче июльдә), Федерация Советында Хаҗ буенча Советның 2024нче елгы хаҗ сезоны нәтиҗәләрен тикшерүгә багышланган киңәйтелгән киңәшмәсе узды. Әлеге чара Федерация Советының Аграр-азык-төлек сәясәте һәм табигатьтән файдалану комитеты рәисе урынбасары, Россия Федерациясе сенаторы Б.Б.Хамчиев һәм Россия Хаҗ миссиясе җитәкчесе Х.А.Асуев җитәкчелегендә үткәрелде.
Киңәшмәдә РФ Президенты Администрациясе, РФ Хөкүмәте, РФ Тышкы эшләр министрлыгы, РФ Икътисади үсеш министрлыгы, Роспотребнадзор, Росавиация, Милләтләр эшләре буенча федераль агентлык вәкилләре, Россия мөселманнарының төрле Диния нәзарәтләре, Россия хаҗ операторлары вәкилләре, шул исәптән “ДУМ РТ Хаҗ” генераль директоры Ранис Вахитов катнашты.
Утырышта катнашучылар киңәшмә барышында 2024нче елның хаҗ нәтиҗәләре турында доклад тыңлады, оештыручылар исә килеп чыккан проблемалар турында фикер алышты, шулай ук Мәккә һәм Мәдинә җирләренә сәфәрне оештыруны яхшырту буенча тәкъдимнәр яңгырады. Катнашучылар, килеп туган кыенлыкларга карамастан, хаҗның югары дәрәҗәдә тәмамлануын билгеләп үтте.
Фотосурәтләр: РФ Федераль Җыенының Федерация Советы.
