Әлмәт шәһәренең яңартылган Җәмигъ мәчетендә Пәйгамбәребез Мөхәммәд ﷺ туган аена багышлап “Мөхәммәд ﷺ бөек әхлак иясе” дип исемләнгән кичә узды.
Әлеге кичәгә төрле яшьтәге 100дән артык дин кардәшебез килде, катнашучылар арасында имамнар, мәчеткә йөрүчеләр, мөгаллимнәр, шәкертләр, шулай ук балалар да бар иде.
Күркәм гадәт буенча, Мәүлид ән-Нәби Коръән аятьләре уку белән башланды. Аннары Әлмәт шәһәренең “Нур” татар-мөселман мәктәбе укучылары чыгыш ясады. Алар үз чыгышында укытучыларга хөрмәт күрсәтүнең әһәмияте һәм яхшы дуслар табу кирәклеге хакында сөйләп узды. Алга таба Мәүлид ән-Нәби кысаларында мөнәҗәтләр башкарылды. Әлмәт шәһәрендә яшәп иҗат итүче яшь шагыйрь Руслан Брю (Руслан Бажутов) шигырьләр укыды, ә Әлмәт имам-мөхтәсибе ярдәмчесе Рүзил хәзрәт Ихсанов мөнәҗәтләр әйтте. Кичәдә катнашучылар Рабигыль-әүвәл аеның фазыйләтләре хакында вәгазь тыңлады, аны Әлмәт районы имам-мөхтәсибе Исмәгыйль хәзрәт Сингатуллин һәм Мөслим районы имам-мөхтәсибе Илгиз хәзрәт Сөнгатуллин сөйләп узды. Алар шулай ук һәр мөселман кешесенең югары әхлакый сыйфатларга ия булырга тиешлеге хакында билгеләп үтте. Аннары катнашучылар бергәләп дога кылды.
Шунысын да билгеләп узарга кирәк, Рабигыль-әүвәл аенда Әлмәттә төрле яшьтәге инвалидлар өчен хәйрия ашы оештырылды.
