Бүген, рабигыль-ахыр аеның 1нче көнендә (4нче октябрьдә), “Мөхәммәдия” мәдрәсәсендә Халыкара өлкәннәр көненә һәм Укытучылар көненә багышланган тантаналы чара үтте. Әлеге вакыйга барышында укытучыларга һәм хезмәткәрләргә кадер-хөрмәт күрсәтелде.
Истәлекле чараны мәдрәсәнең уку-укыту һәм тәрбия эшләре буенча директор урынбасары Зөлфәт хәзрәт Габдуллин Коръән аятьләре һәм дога укып ачып җибәрде.
Аннары “Мөхәммәдия” мәдрәсәсе җитәкчесенең беренче урынбасары Рөстәм хәзрәт Вәлиуллин өлкәннәргә мөрәҗәгать итте – алар барысы да күп еллар дәвамында әлеге уку йортында хезмәт иткән мөхтәрәм укытучылар һәм хезмәткәрләр. Ул аларга Халыкара өлкәннәр көне һәм Укытучылар көне уңаеннан изге теләкләрен җиткерде, рәхмәтен белдерде һәм бүләкләр бирде. Рөстәм хәзрәт тарафыннан олуг рәхмәт сүзләре Камил хәзрәт Вәлиуллинга, шулай ук хезмәткәрләрдән Нурия Хәнәфина, Гөлчәчәк Мингалиева, Әлфия Мастюкова, Мәүлия Сафина һәм Тәнзилә Гыймалтдиновага белдерелде.
Чыгышлар тәмам булганнан соң очрашу чәй өстәле янында дәвам итте.
