“Туфан” мәхәлләсе Чаллы шәһәрендә милли-дини күтәрелеш елларында башта дөньви мәхәллә буларак оештырыла. Чөнки ул елларда, татарлар мәхәллә принцибы буенча яшәргә тиеш, дигән фикер киң таралган иде. Аннары ул дини юнәлеш ала. Мәхәлләне оештыручы, “Туфан” мәчете төзелешен җитәкләүче, бүгенге көндә дә аның имам-хатыйбы - Равил хәзрәт Нуруллин (югары белемле төзүче). Мәчеттә гыйбадәт залыннан тыш уку класслары, ашханә, ит кибете бар. Таштан ясалган ишек алды коймасы үзе бер сәнгать әсәре булып тора. Мәчет калку урында, ерактан игътибарны тарта, үзенчәлекле архитектурасы урынына бик килешле итеп ясалган.
Мәхәлләнең 20 еллыгына багышланган тантанада аның тарихы искә алынды, алга таба планнар белән уртаклашынды. Ошбу чарада шәһәр имам-мөхтәсибе Әлфәс хәзрәт Гайфуллин, төбәк казые Рөстәм хәзрәт Шәйхевәлиев, шәһәр хакимиятенең җәмәгатьчелек белән элемтәләр бүлеге башлыгы Рөстәм Галиуллин һәм башка кунаклар катнаштылар, мәхәллә әгъзаларын шушы истәлекле дата белән котладылар. Өйлә намазыннан соң юбилейга багышлап аш мәҗлесе үткәрелде, дип хәбәр итә Чаллы мөхтәсибәте.
