Бу көннәрдә Малайзия дәүләт телерадиокомпаниясе журналистлары Татарстанда татарларның рухи тормышы хакында документаль фильмнар төшерү белән мәшгуль. Бүген алар Татарстан мөфтие Камил хәзрәт Сәмигуллин белән очраштылар. Камил хәзрәт чит ил журналистларына татарлар арасында ислам таралу, республиканың бүгенге мөселман өммәте, ТР МДН эшчәнлеге хакында сөйләде.
Татарстан мөселманнары хакында тапшырулар, Малайзия дәүләт телерадиокомпаниясе продюссерлары Мохд Фирәдүс һәм Ризван Мохтар әйтүенә караганда, Рамазан ае дәвамында күрсәтеләчәк.
Ике атна дәвамында чит ил журналистлары Россия ислам университетында, "Ярдәм" күзләре күрмәүчеләрне укыту-тернәкләндерү үзәгендә, "Хузур" нәшрият йортында һәм башка мөселман оешмаларында булдылар. Татарстанда әле алар 19 апрельгә кадәр эшләячәк.
