ТР МДН чакыруы буенча Казанга Кувейтның “Ән-Нури” хәйрия фонды җитәкчесе Җамал ән-Нури килде. Ул нәзарәтнең иҗтимагый эшчәнлеге белән танышты, Болгардагы тарихи урыннарны карады, Казанның Иске татар бистәсендә, “Кол Шәриф” һәм “Мәрҗани”, “Ярдәм” мәчетләрендә булды.
Аннары дәрәҗәле кунак нәзарәттә Татарстан мөфтие Камил хәзрәт Сәмигуллин белән очрашты. Бу очрашуда сүз хәйрия проектларын тормышка ашыруда хезмәттәшлек итү турында барды. Шулай ук Камил хәзрәт “Хузур” нәшрият йорты эшчәнлеге турында сөйләде һәм чит ил кунагына хөрмәт күрсәтеп “Казан басмасы”н бүләк итте.
