21 сентябрьдә Әтнә районы Мамыш авылында 100 кеше сыйдырышлы яңа мәчет ачылды. Мәчет ачылышында район имам-мөхтәсибе Наил хәзрәт Сәгъдиев, нәзарәтнең дәгъват бүлеге хезмәткәре Тимергали хәзрәт Юлдашев, җирле хакимият вәкилләре, кунаклары, авыл халкы катнашты.
Тимергали хәзрәт мәчет ачу бәйрәменә җыелганнарны Татарстан мөфтие Камил хәзрәт Сәмигуллин исемннән сәламләде һәм ислам дине кыйммәтләре, мәчеткә йөрү мөһимлеге хакында вәгазь сөйләде. Шулай ук ул мәчет төзергә булышкын иганәчеләргә мөфтинең рәхмәт хатларын тапшырды.
Мәчет ачу бәйрәме җәмәгать намазы уку белән тәмамланды.
