Төркиянең Казандагы генераль консулы Сабри Тунчи Ангылы Әлмәт районының Ризаэтдин Фәхретдинов исемендәге үзәк мәчетендә булды. Биредә консул өчен экскурсия оештырылды. Мәчет имамы Әбүбәкер хәзрәт Әбдеев Әлмәттә дин үсеше һәм мәдрәсә эшчәнлеге белән таныштырды.
Сөйләшү чәй табыны артында дәвам итте. Дин әһелләре татарларның төрекләргә ясаган йогынтысы, тарих турында гәп кордылар. Генераль консул алга таба да татарлар белән төрекләр арасындагы дустанә мөнәсәбәтләрне саклау, элемтәләрне ныгыту кирәклегенә басым ясады.
