Зәй районы үзәк мәчетендә рамазан ае дәвамында ифтарлар, тәравих намазлары уздырыла. Мәчеткә җыелган халыкка уңайлы булсын өчен бирегә рамазан башлануга кондиционерлар куйдырганнар. Бу уңайдан мәчеткә эшкуар Саматовлар булышкан.
Зәйдә рамазан аенда яңа мәчет тә ачарга җыеналар. Район имам-мөхтәсибе Сәгыйть хәзрәт Камалов хәбәр итүенә караганда, “Заготзерно” бистәсе мәхәлләсендә төзелгән яңа мәчет ачуга әзер. Моннан тыш хәзерге вакытта “Түбән” мәхәлләдә яңа төзелгән мәчеттә бизәү эшләре бара. Бу иман йорты берникадәр соңрак ачылыр дип көтелә. “Мирный” бистәсендә исә яңа мәчеткә нигез салынган, хәзер аның диварлары корыла башлаган. Сармаш-Баш авылында мәчет төзергә документлар әзерләнә, озакламый догалар укып аның нигезен салырга җыеналар.
